Leiðbeiningar um stjórnarhætti fyrirtækja voru fyrst gefnar út árið 2004 og hafa þær verið endurskoðaðar með reglubundnum hætti frá þeim tíma. Leiðbeiningunum er ætlað að nýtast sem verkfæri stjórna og stjórnenda til að mæta þeirri ábyrgð sem á þeim hvílir, en það er skoðun útgefenda að með því að fylgja góðum stjórnarháttum megi styrkja innviði fyrirtækja og efla almennt traust gagnvart viðskiptalífinu. Hvort tveggja skiptir sköpum fyrir samkeppnishæfni íslenskra fyrirtækja og æ fleiri fyrirtæki sjá sér hag í því að fara að leiðbeiningunum.

Útgáfuaðilar tóku ákvörðun að skipa nefnd með formlegri hætti og hún starfi óháð hverri endurútgáfu. Nefndin er skipuð sérfræðingum úr atvinnulífi og háskólasamfélaginu. Nefndarmenn eru níu, tveir skipaðir af  hverjum útgáfuaðila, formaður og varaformaður skipaðir sameiginlega og einn af Landssamtökum lífeyrissjóða. Nefndarmenn eru skipaðir til 4 ára í senn og geta lengst setið í nefndinni tvö tímabil í röð.