Aðildarfélagar
Eftirtaldir einstaklingar, fyrirtæki og félög áttu aðild að Viðskiptaráði Íslands á árinu 2023:
Félagar og heiðursfélagar
Innan raða Viðskiptaráðs eru fyrirtæki, einstaklingar og stofnanir í fjölbreyttum rekstri. Reglulega bætast nýir félagar í hópinn auk þess sem fjöldi fyrirtækja hefur starfað með Viðskiptaráði frá upphafi.
Heiðursfélagar Viðskiptaráðs
Samkvæmt lögum Viðskiptaráðs Íslands er stjórn ráðsins heimilt að skipa heiðursfélaga. Til þeirrar nafnbótar geta þeir unnið sem hafa lagt sérstaklega mikið af mörkum í þágu viðskiptafrelsis og framfara í atvinnulífinu.
Heiðursfélagar Viðskiptaráðs frá upphafi:
- Garðar Gíslason (f. 1876, d. 1959) – útnefndur 1958
- Egill Guttormsson (f. 1892, d. 1970) – útnefndur 1967
- Ragnar S. Halldórsson (f. 1929, d. 2019) – útnefndur 2012
- Haraldur Sveinsson (f. 1925, d. 2019) – útnefndur 2012
- Hjalti Geir Kristjánsson (f. 1926, d. 2020) - útnefndur 2012
- Davíð Scheving Thorsteinsson (f. 1930) – útnefndur 2012
- Jóhann J. Ólafsson (f. 1935) – útnefndur 2012
- Einar Sveinsson (f. 1948) – útnefndur 2020
Minning – Davíð Scheving Thorsteinsson
Davíð Scheving Thorsteinsson fæddist 4. janúar 1930 og lést 8. apríl 2022.
Davíð var alla tíð í orði og verki boðberi frelsis og íslenskt samfélag á honum margt að þakka. Hann var brautryðjandi í atvinnustarfsemi og snjall markaðsmaður sem kynnti margs konar nýjungar fyrir landsmönnum, en ekki síst var hann óþreytandi í baráttu sinni fyrir viðskiptafrelsi og betra rekstrarumhverfi.
Davíð var gerður að heiðursfélaga Viðskiptaráðs Íslands árið 2012, eftir áratuga starf í og fyrir íslenskt viðskiptalíf. Hann var einn af þessum mönnum sem virðast hafa fleiri tíma í sólarhringnum en annað fólk og þótti gott að leita til hans.
Sumarið 2003 hóf Viðskiptaráð Íslands vinnu við leiðbeiningar um stjórnarhætti fyrirtækja og tók Davíð að sér að leiða það verkefni. Um haustið fékk ráðið Kauphöll Íslands og Samtök atvinnulífsins að borðinu með það fyrir augum að skapa breiða samstöðu meðal fyrirtækja og komu leiðbeiningar um stjórnarhætti fyrirtækja út í mars 2004. Sýn Davíðs og þeirra sem stóðu að þessari fyrstu útgáfu var skýr, eins og kemur fram í inngangsorðum leiðbeininganna. Viðskiptalífið ætti sjálft að taka frumkvæði að því að setja sér reglur og auka þannig innra eftirlit og aðhald innan fyrirtækja. Á árunum fram að útgáfunni hafði frelsi í viðskiptum farið vaxandi og – eins og sagði einnig í inngangsorðunum – fylgir frelsi ábyrgð.
Höfundum leiðbeininganna var umhugað um að fyrirtækin öxluðu þá ábyrgð og var í þessari fyrstu útgáfu réttilega bent á að með því að auka traust hluthafa, starfsmanna, viðskiptavina og almennings mætti skapa fjölmörg tækifæri til lengri tíma litið. Þannig væri gagnkvæmt traust almennings og viðskiptalífs lykill að bættri samkeppnisstöðu Íslands og betri lífskjörum. Þótt leiðbeiningarnar hafi síðan verið endurskoðaðar og endurútgefnar með reglubundnum hætti var þarna lagður ákaflega mikilvægur grunnur að starfsreglum um betri stjórnarhætti.
Viðskiptaráð Íslands þakkar Davíð ómetanlegt starf í þágu viðskiptafrelsis og framfara í atvinnulífinu.