Starfsemi millilandaráðanna er fjölbreytt þar sem hver viðburðurinn rekur annan bæði hérlendis og erlendis. Á síðustu tveimur árum hefur verið lögð rækt við að millilandaráðin efli samvinnu sín í milli og leitist við að koma á framfæri sameiginlegum hagsmunum þegar það á við. Formenn ráðanna hafa af þessu tilefni hist á formannafundum sem hefur mælst vel fyrir og fer formannaráð fremst í flokki með umsjón og framkvæmd sameiginlegra viðburða formanna og ráða. Á undangengnum árum hefur viðburðadagatal millilandaráðanna boðið upp á fjölbreytni á borð við; viðskiptasendiferðir, ráðstefnur, morgun- og hádegisverðarfundi, opna fundi, móttökur, fyrirtækjaheimsóknir, forsýningar kvikmynda og bíókvöld, útgáfuboð, vínkynningar, steikarkvöldverð, golfmót, o.s.frv. o.s.frv. Öllum ráðum hefur gengið vel að viðhalda félagafjölda og fá til liðs við sig nýja félaga þrátt fyrir heimsfaraldur.

Árið 2017 formgerðu Alþjóðaviðskiptaráðin samstarf sitt við utanríkisráðuneytið með samstarfssamningi sem fól í sér að hvert og eitt millilandaráð annars vegar og utanríkisráðuneytið hins vegar ætluðu að efla samstarfið með því að sameiginlega vinna að hagsmunum atvinnulífsins, standa sameiginlega að viðskiptasendinefndum erlendis, efla tengsl sendiherra við stjórnir, efla tengsl við formenn og vinna sameiginlega að Alþjóðadegi viðskiptalífsins.

Árið 2020 voru aðilar sammála um að taka samstarfssamning lengra og gerðu með sér rammasamkomulag. Markmið þess samkomulags er að vinna á dýptina með hverju og einu af þeim fimmtán millilandaráðum með að hafa einn fund á ári um málefni sem brýn eru innan þess auk þess að vinna áfram að því að efla Alþjóðadag viðskiptalífsins þar sem fjallað er um málefni sem tengjast alþjóðamörkuðum, erlendum fjárfestingum auk inn- og útflutnings.